எமக்கொரு வீடிருந்தது

 

ஊரில் எமக்கொரு வீடிருந்தது
அதைச் சூழ நிறப்பூவிருந்தது
பூவுக்கொரு மணமிருந்தது
மணத்துள் எம் மனமிருந்தது.
மனத்துள் ஊர் மலர்ந்திருந்தது
மலர்வில் வீடு மணந்திருந்தது
மணம் நிறைய நாமிருந்தோம்
நாமிருந்த கதை ஊரறியும்
ஊர் தறை நாமிழந்தோம்
தறையின் பூவும் தாமிழந்தோம்
நாரழிந்த பூவினிலே 
நறுமணத்தின் வேரிழந்தோம்
வேரிழந்த போதினிலே 
வேறு நிலம் நாம் நகர்ந்தோம்
நாம் நகர்ந்த போதினிலே 
விழுதுகளில் வாழ்ந்திருந்தோம்
வாழ்ந்திருக்கும் விழுதுகளே
வேர்க்கனவாய் ஊடுருவ
வேரறுந்து விழுதினிடை
வெறுமனவே வாழ்வு செல்லும்
எமக்கொரு நறும்பூ மலர்ந்த
வனம் நிறைந்த வீடிருந்ததோர்
சிறு ஊரிருந்தது ஒரு காலை
11/18/2025