வாழ்வறைக்காலச்சுவர்

 

சட்டகத்துட் சிறுசதுரமிட்டு

கட்டமிட்டு வாழ்ந்த காலம்

வட்டத்துள் நாள் பொருந்தி

சுவர் முட்ட உறைந்த நேரம்

உயிர்த்துளி சுவறிச் சொட்டப்

பொழுதுடன் போன பழமை

வாழ்வறைதன் சுவரைப்போல்

கழன்றுபோன கண்ட பொருள்

பாவனை போய் பார்பவிசுக்காய்

மீந்திருந்த பழம்பொருட்பெருமை

வாழ்ந்திருந்தோம் நாம் வளி மூசி

வீற்றிருந்த எந்தையும் போயினன்

ஈந்திருந்த எந்தாயும் போயினள்

எஞ்சிய மட்கலவாழ்வு வெறும்

காலம் துஞ்சாக் கடிகார முள்,

கண்டம் பொறுத்துக் களம்

உள் விழுங்கவும் பொறாது

வெளித் துப்பவும் தப்பாது

தொங்கித் தங்கித் துருத்தியது

நடுச்சாம அலர்துடிநெஞ்சமும்,

நிச்சலன அறைநெடுஞ்சுவரும்!

காலம் வெறும் காய்சருகோசை!

காலன் வரும் காலடியோசை!

11/19/2024