அலையும் கதைகள்

பசும்புல்லிருந்து பொதிந்த பழங்கதைகள்
அள்ளியள்ளிப் பேசியே அலர்ந்ததெம்
நிலாக்காலம். எறிந்தவொளி உலரவென
அலை அலட்டிக் கடல் தள்ளிக் கரை
கால் அள்ளிப்போடவும் மெல்ல எழுந்து
புறமணல் தட்டிப்போய்
எம் காலநிலா அலரப் பேசவென
அள்ளவள்ளப் பழங்கதைகள்
பொதிந்தன புல்லின் பசப்பிலே.

இறந்த எலும்புகட்கு இரைந்திரைந்து
எண்ணச்சுதை சேர்த்தோம் - கூட்டமாய்
இறந்த எலும்புகட்கு இருப்போர் நாம்
அள்ளிச் சேர்த்தோம் ஆவி.
அவரவர் அவிர்ப்பாகம் அசை மெல்ல,
மெள்ள மேனி முளைத்து
அசைந்தலைந்த பழங்கதைகள்
சொல்லாமல் அள்ளிப்போனதாம் - அலை
தள்ளிக்குவித்த தறிநிலாத்துண்டெல்லாம்.


பின்னொரு நாள்,
இறந்த எலும்புகட்கு இரைந்திரைந்து
எண்ணச்சுதை சேர்த்தார் - கை நிறைய
அள்ளிக்கொண்டோம் சொரிவெள்ளிநிலா.

03, ஏப்ரல் 30, புதன்