Anakin Skywalker ஏன் Darth Vader ஆனான்?

தனித் தவிலாலும் ஆகும்
இசைக்கச்சேரி.

ஒத்துழைக்கா ஊதல்,
உடன்படாச் சிறுதாளம்,
மிக்கச் சத்தமிட்டுக் கெடுக்கும்
தவிற்றுவம்.

எருமைத்தோலாலானாலும்
தவிலுக்கும் உண்டாம் தன்மானம்.

பல்வாத்தியக்கச்சேரி என்பது
மேடைக்கு
முழுக்குத்தகை ஒப்பந்தமாகாது.

வாத்தியம் பல பரப்பி
தன் ஒற்றை ஒலி மட்டும்
ஊதல் துப்பித்திருத்தல் உள்ளில்லை
சுகலயம்.

வேளைகளில்,
தற்பெருமை மிக்கது ஊதலின் காற்று.
தத்துப்பித்தென்ற மொத்தவூதலின் மூச்சு
மச்சவீச்சம் வெட்டவெளிப்படுக்கை வீசுமென்றால்,
அம்மேடை விலகி
தனித் தவிலாலும் ஆகும்
பிறிதொரு தளம்
இசைக்கச்சேரிக்களம்.

தன் தட்டலின் உச்சத்தே
ஊதலின் ஒய்யாரம் காட்டுதற்காய்
தனை முறித்து
ஓய்வெடுக்கப்போகாது
மேளம்.
தவில் ஒன்றும்
வில்லிசையின் விகடனல்ல.

நான்கு வாத்தியம்தம்
நாததாள இலயிப்புணர்வில்
நாதஸ்வரத்துக்கு இல்லை,
நான் மேலென்ற நாட்டியநடை.

கைத்தாளங்கள்,
தட்டிக் கொடுத்துக் கூட வர....
மணவறையிற் தோழனென்று,
மலர்தாங்கக் காம்புவென்று.
தோள்தாங்கு தாளங்களே
தலையாகா எப்போதும்....
அ·தாகா வேளை,
தவிலின் தோலுக்கும்
சுரணைப்பட்டு
நமைக்கும் முதுகு.

பின்னே
இன்னொரு கருவித் தொண்டைக் குரல்
அழுத்தித் தன் அழகு காட்டாது
தனித் தவிலாலும் ஆகும்
முழுமேடை
இசைக்கச்சேரி.

இன்றைக்காகிப்போயினும்கூட,
தவில்கள்
இனி வரும் நாளுக்காகா,
எம் முன்றலிலும்
கருங்குதிரைகள்.

இற்றைமேடைக்குமுன்
இசை இரசிகர்களென்று
எவருமில்லை;
நாயனங்களின் கச்சேரிகள்
அவைதம் அருகுக்கும் அன்புக்குமுரிய
ஒத்தூது நாயனங்களுக்கே.

கேட்டும் கேளாததாயிருக்கும் வேளையிலே,
முதன்மைநாயனங்களின் மூக்குப்பிசிறல்கள்,
முகரப்பட சக்தியற்றவை என்க
மற்ற நாயனங்கள்.

நாதஸ்வரங்கள்
நாணிப்போகும்
நாளை.

வீண் நீர் மட்டும்
அவையிருந்து வெளிவடியும்.

கைத்தாளங்கள்,
அன்றைக்கு
அறைவிடுத்துக்
கூறலாம்/
கூவலாம்,
ஊதலுக்காய்
ஒலித்ததில்லை
எம் உடலங்கள்
என்றும் பொய்.

தவில்களோ என்றும் தங்கியிருத்தலில்லை
கையடங்கு பையுறங்கு சின்னத் தாளங்களில்.
அவை தாமே ஆனவை
தம்மை அடிப்பானுட் கொண்டு
தாளம்.

காற்றை இழுத்து உயிர்ப்பது ஊதல்.
காற்றைப் புடைத்துச் சிலிர்ப்பது மேளம்.

காழ்ப்புணர்விற் புடைபடு வேளையிலும்
தவில் என்றும் தன்னளவில்
அடிப்போன் விரல்நளினம் மட்டும்
வேண்டிய வித்தியாசமான வாத்தியம்.

நாதம் ஓய்ந்தபின்னும்
தொடரும்
தாளம்.


'99 ஜூன் 11, வெள்ளி 14:25 மநிநே.