சில தறிகெட்ட தர்க்கமறு கேள்விகள்

உன் வியர்வையில் எத்தனை விழுக்காடுகள்
வெயிலின் வீரியம் என்று சொல்லிப் போக முடியுமா?
நேற்றைய மாலை நிலவில் எத்தனை காதலர்கள்
ரோஜாப்பூக் கொடுத்து ஒரு உதட்டுப்பூ வாங்கிப் போனார்கள்
என்றாவது...
அதை விடு;
எத்தனை வண்ணாத்துப்பூச்சிகள் புழுப்பெருத்து மயிர்க்கொட்டிக் கூடுடைத்து
சிறகெடுத்துக் காற்றுக்கு காதல் கவிதை சொல்லிக் காலை போனது
பற்றி....
போகட்டும்;
காலை கடலுக்குள் தோய்ந்த கதிரவன்
மலைக்குள் மாலை காம விழா நடத்தப்போனது பற்றியாவது
ஏதாவது.....
புரியாது;
ஒரு நாட் குழந்தையின் முதல் வாந்தியின் புளித்த பால் மணம்
பற்றியாவது
சில பந்திகள் எழுதிவைக்கும் திறன்......
எதுவுமே தெரியாது;
பிறகுமென்ன இலட்சத்தொரு அர்ச்சனைக் கணக்கு பார்ப்பாய்
உன் காதலினைப் புரிந்துகொள்ளாக் கன்னியர் தொகை பற்றி,
தூரப்பார்வைக் கண்ணாடிக்குள்ளாக கணினிப் பொறியியலாளா?