உரல்களுக்குப் பின்னே உலவியதெம் உலகம்

உரல்களுக்குப் பின்னே உலவியதெம் உலகம்.

உலக்கையின் விழுத்தல்கள், உளப்பதிவுகள் ஆகும்.

அவள்களின் உலகம்,
உரல்களின் பேச்சும்
உலக்கையின் இடிப்பும்.

உலகு சுழலச்சுழல பதிவுகள் பெருகும்.
அரிசிப்பதிவுகளின் மேற்படியும் உமியும் தவிடும்.

உமிகூடக் கரியாகும்;
பல் வெளுக்கும்.

புழுங்கற் றவிடு,
வீடு மணக்கும்.

செழிக்கும் முற்றம்.

அந்நாளில்,
அவள்கள் கனவுகளின் வளப்பம்,
இடுப்புரல்-பூணுலக்கை
பொருதிப் புணர்தலுள்ளே
வெறுமனே முடக்கம்.

******
இன்று,
அவள்களின் உலகம்
உருண்டது;

மெல்லென அவலத்துள்,
அவல்-பேச்சுத் தின்றது
மெல்லும் உரலடி நாக்கு;

நிலை குத்த
உலக்கை தூக்கு தளிர்க்கை
நிதானித்து,
கிடக்கையிலே,
உரப்பையுட் கலப்பை தாங்கி
நெடுக்கினில் நடக்கும்.

சினைப்படு கனவும் கவலையும்
அற்றுப்போனது சிறுமிகள் கருப்பை.

பேரிடி கேட்கும்;
மின்னல் முளைக்கும்.

சமரில் ஆணுக்குப் பெண் சமனென்று
வெறும்பேச்சுக்குப் பின்னாலும் கொட்டியது முரசு.

******

உரல்கள் இடி ஒலி ஓய்ந்தன;
உருண்டன ஒரு மூலைக்குள்.
உலக்கைகள் சுவர் சாய்ந்து தூங்கின.
பூண் மழுங்க,
போயின பேர்புகழ்.

நெற்குதங்கள் பாதி குதம் வற்றிச் செத்தன;
மிச்சமோ இயந்திரத்தைக் குத்தகைத்து
சத்தமொழியாது சல்லித்துப் போவன.

சிகண்டிப்பேடிகள் நாங்கள்மட்டும்,
உரலடிப் பேச்சுடன்
எட்டத்திலோடி ஒளிந்துகொண்டோம்;
பின், இன்னும் பேசுகின்றோம்....
.......................... பேசுகின்றோம்....
ஓய்ந்த இடுப்புரல்களையும்
தூங்கு மரவுலக்கையையும்
துளிர்க்கவைத்தல் எவ்வண்ணமென..

*******
ஊர் விட்டு ஊர் தேடி,
உலங்கு வானூர்திக்குக் கீழே ஓடத்தொடங்குமுன்னே,
முற்றத்து உரல்களுக்குப் பின்னே உலவியதெம் உலகம்.

'00/04/26