எளிமை

எளிமையான வர்ணப்படமொன்றிலே,

கறுத்தது கறுப்பில்லை

சிவத்தது சிவப்பில்லை

வெளுத்தது வெள்ளையில்லை

எளிமையான உருவப்படமொன்றிலே

ஒரு பெருங்கோடு இன்னொரு சிறுகோடு

ஒரு சிறுவட்டம் பிறிதொரு பெருவட்டம்

படமொன்றினைக் காண்பவருக்கு

வர்ணமும் உருவமும் 

எளிதில்லை.

எளிதானது, பார்வை!

எளிதற்றது , பார்வை!

பார்வை, எனதானது!

அரசியல் மறை

இத்தனை நாள் வளர்த்த அரசியலை என்ன செய்யலாம் என்றேன்:

பிள்ளையின் புத்தகப்பெட்டிக்குள்ளே மறைக்கலாம் என்கிறாய்.

மறைகளே துன்பத்தின் காரணமென்கிறேன்!

நூலற, திரி பிரித்துத் திறந்து வைக்கிறேன்! 

தரவுகள் போதும்! வரலாறு வேண்டாம்! 

விசனவசனங்கட்கப்பால், வரலாறுகள் 

நுனிமயிரையும் விடுதலை செய்ததில்லை.

தளையறுத்த தனியொருவனென்பது

விட்டு விடுதலை!

அடங்காக்காற்றைக் குடத்துநீர் அகற்றட்டும்!

ஒக்ரோபர் 13, 2021